කවියෙක් විචාරකයකුට කියූ දෙය

සාහිත්‍ය විචාරකයන්ට පමණක්ම නෙවෙයි කඩ පිලේ මග තොටේ හිඳගෙනද, Blog Comment ලෙසද විචාර දක්වන නෝනා/මහත්වරුන්ට මට කියන්නට ඇති දෙය නම්:


මම කවි ලියමි
කවි චගේ පෙනෙන වෙන වෙන දේ ද ලියමි
කතා ද ලියමි
ඉඳගෙනද හිටගෙනද ලියමි
දේශපාලනයක් ගැන නොලියමි

මහත්වරුනි
මා ලිවුවේ කවි පමණක්ය
මා ලිවුවේ මිනිසුන් ගැනය
මා ලිවුවේ ගහ කොළ ඇල දොළ ගැනය
ඉර හඳ යට, ගහ කොළ අසබඩ
මිනිසුන් ජීවිතය ගැට ගසනා අන්දම් ගැනය
ඉන් දේශපාලනයක් කලේ මහත්වරුනි නුඹය

බඩගින්නට පාටක් පක්‍ෂයක් නැත
මනුස්සකමට ජාතියක් ජන්මයක්ද නොමැත
සතා සීපාවාට ගහ කොළට මිළක්ද නොමැත
ඒ ගැන ලියැවෙනා බැවින්
මගේ කවියට දේශපාලනයක්ද නැත
මා රැවුලත් වවා නැත, සටන් පාටද කියා නැත
තාප්පයේ බෝක්කුවේ හිඳ පොදු වැසිකිළිය දක්වාම
පෝස්ටර් ගසා නැත
රූප පෙට්ටියේ දී ගුණ ගායනා කරවාගෙනද නැත
කුමන්ත්‍රන ගැනද, එ මතු
අ ඉ උ යනාදී අසූ කෙළක් වූ
දේශපාලනික මතවාද, සංවාද මෙකී නොකී
ප්‍රවාද අපවාද ගැනද මහත්වරුනි
මා නොලිවුවේමැයි

මා නිවටයකු වන්නට ඇත
නිවටයකු ලෙස ජීවත්වන්නටද ඉඩ ඇත
ඒත් මා ලියූ කවි ඇත්තයි
මනුස්ස ජාතියට හිතයි
ඉරෙන් දියෙන් පැවතෙනා ලෝකයට අවංකයි
ඒ කවියෙන් දේශපාලන අරුත් සොයන
නුඹ ඉන්නා තැන මහතුනේ හරිම නිරසයි
විචාරයෙන් චාරයක් සෙයන්නැයි කියමින්
නුඹ ගෙනෙනා දෙය අවිචාරයයි

මා කවියක් විතරක්ම වන කවියක් ලියූ විට
හැම දේ ගැනම,
පාට කණ්ණාඩි දාගෙන ඒ කවියෙන්
වචන ඉරාගන්නත්
දේශපාලනයක් කරන්නත් මහත්වරුනේ
නුඹට ඇති සදාචාරය කිම?

© ගවීන් ප්‍රභාසර


මම කවි ලියමි. මට හැඟෙන දැනෙන දේ ලියමි. ගහ කොළේ පටන් මිනිස් ජීවිත අරගලේ ගැන ලියමි. දේශපාලනයක් නොලියමි. මගේ කවියෙන් ඔබ දේශපාලනය නොකරන්න. ඔබ මනුස්සයකු ලෙස කල යුතු දෙය කරන්න.

අවුරුද්ද ඇවිත්

මීට හෝරා කීපයකට පෙර උදා වූ අලුත් අවුරුද්ද සාමය සෞභාග්‍යය සපිරි සිරි සුබ නව වසරක් වේවා!

අවුරුද්ද ගැන පාසල් කාලයේ ලියූ කවියක් මෙහි සටහන් තබා ඔබට අවුරුදු සිරිය රිසි සේ විඳගන්නට යන්න ඉඩ දෙන්නම්.


වෙල් ලන්ද දිගේ අවුරුද්ද ඇවිත්
සූරිය දෙවියෝ වැඩ අල්ලාලා
කොවුල් කැලට තොර තෝංචියක් නැති
ඒ කතන්දරේ කෑ ගහලා

බැද්ද පුරාවට රංචු ගැහී
හැඩකාර මල් පොකුරු හිනැහීලා
නෑදෑගම් යන සමනල රෑනම
ගොඩවී යන්නට ඇවිදිල්ලා

මැද්දෙ වෙලේ පැහිලා වැනි වැනි උන්
කරල් කමත මැද ගොඩ ගැහිලා
ගම් මැද්දේ රත්තරන් ගලා යයි
අවුරුදු සුවඳට ඉව අල්ලා

බක් මහ එලියට දිස්නෙ දිදී
ගම්මානෙ ඉතින් කල එලි වැටිලා
තරගෙට නෑගම් යන්න කලින්
එක සී පදයක්වත් කියපල්ලා

© ගවීන් ප්‍රභාසර


ඔබ සැමට සුබ නව වසරක්!

පැමිණියෙමි,... නැවතත්

ජීවිතේ අනේක දේ සිදුවෙමින්, අතුරු ආන්තරා සිදුවෙමින්, රාජකාරිවලටම විතරක් ගලා ගිය පසුගිය මාස ගනණාවකට පස්සේ, අනාගතේ ගැන හිතා බලන්නටත්, හිතේ නිදහසේ ඉන්නටත් ඉඩක් ඔන්න ලැබුනු නිසා,....

බිඳක් වැටුණු මහ පොළොවට
ගඟක් ගලන තුරු ගැන ගැන
හිතක් අරා පැතුම් පුරා
හීන පෙනෙනවා

හිසෙන් බිම තබා මහ මෙර
කටු කොලේ නවා ගත්තම
කාබන් පෑනෙන් ආයෙත්
වචන ගලනවා

පෙනෙන්නට නුබේ තරු මිණ
පමා වැඩි වුනත් එළිවෙන
පාන්දරට හදිස්සියේ
පාර පෙනෙනවා

ලිතෙන් දින බලා ගැන ගැන
බලාගෙන උන්නු පන්හිඳ
මුකුත් වුනු නොවුනු ගානට
කුරුටු ගානවා

පහේ කණිසමත් ලඟ ලඟ
එතත් හිතට ආ නිදහස
ඔහේ මොකද කියා යලිත්
කවි අමුනණවා

නිවා යන්තරේ හනිකට
නිදා ගන්න ඇතත් අදට
තබා සටහනක් විගහට
යතුරු ලියනවා

© ගවීන් ප්‍රභාසර

(විනාඩි ගනණකින් කුරුටු ගා,... නිදිමත හැදෙන්නට පෙර යතරු කල බැවින්, අකුරු, වියරණ හා අන් දොස් ඇතොත් කමන්න.)